نعت رسول ﷺ

از:-محمد سمعان خلیفہ بھٹکلی ندوی

میری سوچیں میری فکریں تیری اک اک بات کے نام
پیار کی ساری خوشبوئیں ہیں تیری پیاری ذات کے نام
اُمّی ہوکر تو نے کیسے گوہر پارے بخشے ہیں
گنجِ گراں مایہ ہے نچھاور تیرے ارشادات کے نام
جود وعطا اکرام ونوازش سب کچھ تیری ذات پہ ختم
ابرِ کرم اور بحرِ سخا ہیں طیبہ کی خیرات کے نام
جس سے تابشِ محفلِ امکاں، بزمِ فلک جس سے پرنور
دل کی دنیا واری میں نے اس نوری سوغات کے نام
راہِ ہدیٰ میں حسنِ عمل کی جگمگ جگمگ قندیلیں
فکر ونظر کے نور کا ہالہ مشکاتِ آیات کے نام
کون ومکاں کی شمعِ روشن مشعلِ فاراں کے صدقے
انجمِ رخشاں مہرِ درخشاں طیبہ کے ذرات کے نام
دل کی آنکھوں نے جو دیکھی نورِ ہدیٰ کی برکھا رُت
اس کے نشاط آگیں نظّارے رحمت کی برسات کے نام
بربطِ شوق پہ تو نے سمعاںؔ ساز جو چھیڑا ہے دل کا
بزمِ طرب کے سارے جلوے نعت کے ان نغمات کے نام