مناجات

شعیب احسن اعظمی ندوی

اے کرم گُستر، شفیق و مہرباں
مالکِ ہر دو زمین و آسماں
اے کہ ہر اک شے تری قدرت میں ہے
اے کہ تابعدار تیرے انس و جاں
کیا تری تسبیح میں لکّھے قلم
سب تری تعریف میں رطب اللساں
سب کو تیرے ذکر ہی سے کام ہے
خلقتِ خاکی و نوری بے گماں
تو کہ تیرے وصف وہّاب و عطا
فضل و بخشش، جود سب تیرے نشاں
تو کہ تیرے در سے ہے مایوس کون
تو کہ ہر اک پر ہے یکساں مہرباں
تیرے آگے ہاتھ پھیلاتا ہوں میں
نفع سے یا رب بدل دے ہر زیاں
آرزوؤں کو مری شاداب کر
کوششوں کو میری کر دے کامراں
تو تو واقف ہے مرے مقصود سے
اک دعا ہے ہر دعا کے درمیاں